Buidheann Chorporra Pàrlamaid na h-Alba ùr air a taghadh

051/2007g | 24 Cèitean 2007

An-diugh (Diardaoin) thagh Pàrlamaid na h-Alba ceathrar Bhall airson Buidheann Chorporra Pàrlamaid na h-Alba (BCPA).

Bidh a’ Bhuidheann Chorporra a’ beachdachadh agus a’ co-dhùnadh air raon farsaing de chùisean a’ buntainn ri ruith na Pàrlamaid, a’ gabhail a-steach maoineachadh na Pàrlamaid agus riarachadh a’ bhuidseit aice, solarachadh luchd-obrach na Pàrlamaid, togalaichean, agus cleachdadh is tèarainteachd goireasan na Pàrlamaid aig Taigh an Ròid.

Thachair na taghaidhean airson ballrachd BCPA ann an Seòmar-deasbaid Taigh an Ròid aig 9.15 sa mhadainn an-diugh agus thagh BPA na tagraichean a leanas: Ailig MacIain BPA, Tom Mac an Aba BPA, Tricia Marwick BPA agus Mike Pringle BPA.

Thuirt an t-Oifigear-riaghlaidh Ailig MacFhearghais BPA, a bhios anns a’ chathair aig BCPA:

"Tha an seisean ùr seo a’ nochdadh dhùbhlain ùra – agus Buidheann Chorporra ùr gus dèiligeadh riutha.  Tha mi a’ dèanamh fiughair ri aghaidh a chur ris a’ ghnothach còmhla ri mo cho-obraichean airson àrd phrìomhachas na Buidhne Corporra agus a sgioba a choileanadh - dèanamh cinnteach gu bheil Pàrlamaid na h-Alba a’ ruith gu h-èifeachdach agus gur urrainn do na BPA na dleastanasan aca a thoirt a-mach."

Thuirt Ailig MacIain, BPA airson Ear-thuath na h-Alba:

"Is e dùbhlan a bhios ann a bhith dèanamh cinnteach gu bheil na goireasan agus modhan-obrach aig a’ Phàrlamaid a dh’fheumas i airson obair gu h-èifeachdach as leth sluagh na h-Alba, ach tha mi a’ coimhead air adhart ris agus dealas orm a dhol an-sàs sa chùis còmhla ri mo cho-obraichean.”

Nuair a chaidh a thaghadh thuirt Tom Mac an Aba, BPA airson Hamaltain a-Deas:

"Tha obair chudromach aig a’ Bhuidhinn Chorporra a thaobh seirbheisean a tha a’ tabhann luach an airgid a sholarachadh don Phàrlamaid gu lèir.  Tha mi air leth toilichte gu bheil mo cho-obraichean air mo thaghadh airson àite a ghabhail innte.”

Agus thuirt Tricia Marwick, BPA airson Meadhan Fìobha:

"Is e dreuchd chudromach, uallach a tha seo agus tha mi a’ dèanamh fiughair ri bhith dèanamh cinnteach gum bi fìor dheagh sheirbheisean gan lìbhrigeadh do na Buill agus sluagh na h-Alba.”

Thuirt Mìcheal Pringle, BPA airson Dùn Èideann a-Deas:

"Is e onair dha rìreabh a th’ anns an dreuchd seo dhomhsa. Nì mise mo dhìcheall gus dèanamh cinnteach gu bheil a’ Phàrlamaid a’ coinneachadh feumalachdan a Buill agus a luchd-obrach.”

Cùl-fhiosrachadh

Is i Buidheann Chorporra Pàrlamaid na h-Alba (BCPA) a’ bhuidheann reachdail (is e ‘corporrachd na Pàrlamaid’ ainm eile dhi) a bhios a’ coileanadh grunn ghnìomhan, mar a stèidhicheadh ann an Achd na h-Alba 1998, a’ gabhail a-steach solarachadh luchd-obrach, togalaichean agus seirbheisean na Pàrlamaid.

Is iad na buill, an t-Oifigear-riaghlaidh agus ceithir BPA a thèid ainmeachadh a rèir nan Gnàth-riaghailtean.

Airson barrachd fiosrachaidh, is e neach-fiosrachaidh nam meadhanan:

Susan Gray: 0131 348 6245
Post-d: susan.gray@scottish.parliament.uk

Ma tha ceist sam bith agaibh a thaobh Seirbheis Seisean a Trì

nach cuir sibh fios gu Sgioba Seisean a Trì air 0131 348 6500
Post-d: session3@scottish.parliament.uk

Airson cheistean air fiosrachadh poblach/cheistean anns an fharsaingeachd, cuiribh fios gu:

0131 348 5395 (Gàidhlig)

0131 348 5000 (Beurla)

Post-d: gaidhlig@scottish.parliament.uk

Nach tadhail sibh air an làrach-lìn againn aig: www.scottish.parliament.uk/gaidhlig